Albwm Newydd - Heulwen o Hiraeth

Yn ystod y broses o recordio'r albwm newydd yma, un peth a oedde ni gyd yn ffeindio hi'n anodd credu oedd y ffaith fod hi'n 3 mlynedd bellach ers i ni rhyddhau 'Ar Gof a Chadw'...fel ma amser yn fflio!

Cychwyno ni'r gwaith (fi ag Arwel) o fynd ati i sgwennu'r caneuon nol yn mis Awst 2012 wedi'r gemau Olympaidd dod i ben. Gafo ni rhyw 3 neu 4 o sesiynnau sgwennu unai yma yn Llundain neu yn Llanelli lle mae Arwel yn byw, aethom ni hefyd nol i Solffach yn Sir Benfro am dridiau lle sgwenno ni cwpl o'r caneuon oddi ar yr albwm dwetha. Natho ni dreulio 2 ddiwrnod yn y MusicBox yng Nghaerdydd yn cyflwyno'r caneuon i Sion a CJ sef y hogie sy'n chwarae bas a dryms. Gan ein bod ni fewn y noson ar ol Gŵyl San Steffan gafo ni'r lle i ni'n hunain!!

Ath ni ati i gychwyn recordio ar yr 2il o Ionawr yn stiwdio Mei Gwynedd (Sibrydion) yng Nghaerdydd. Dyma fo'r dyn ei hun...

Arwel yn trio allan y banjo...!

Yn gyntaf recordwyd y dryms, bas a'r gitar acwstig i gyd efo'i gilydd yn fyw.

 

Tra o ni'n canu yn y stafell bach yma efo'r enwogion ar y wal...!

 

Yn y gorffenol da ni wedi gwahodd unigolion fel Meic Stevens a Elin Fflur i ganu ar un o'r caneuon ar yr albwm. Tro yma dwi'n falch o fedru deud mai Gwyneth Glyn fydd yn ymddangos. Dwi'n hoff iawn o'r ddeuawd ac mai sicr un o'n hoff ganeuon i o'r casgliad.

Gafo ni hefyd Gareth Thorrington i chwarae'r allweddellau a Lucy Morgan i chwarae'r fiola.  

 

Am y tro cyntaf ar yr albwm yma hefyd da ni wedi cynnwys caneuon pobl eraill.

Yn hytrach na datgelu be yn union da ni wedi dewis mi wnai adael i chi ddyfalu efo bach o gymorth....ma'r dewis cyntaf yn dod o albwm sy'n dathlu 40 mlynedd yn 2014 ers iddo cael ei rhyddhau - dyma'r darlun enwog oedd ar y clawr

 Ma'r ail gan yn gysyllstiedig efo...

ac yn olaf ma genno ni rhywbeth gan y hogie yma -

Wedyn ar y penwythnos olaf ddoth Sarah Howells (Paper Aeroplanes) i fewn er mwyn rhoi ychydig o leisiau cefndir lawr. Ar yr rhu'n pryd gwahoddwyd criw rhaglen Heno (S4C) fewn i weld syt oedde ni'n dod mlaen efo'r recordio.

Mae'r caneuon bellach yn nhwylo Llion Robertson sy'n gyfrifol am eu cymysgu nhw.
Unwaith ma'r broses yna di dod i ben fydd rhaid mastro a wedyn fydd y prosiect wedi'w gwblhau.

Dwi'n edrych mlaen yn fawr iawn at rhyddhau ein drydydd albwm Cymraeg a'n bwysicach fyth medru ychwanegu caneuon newydd i fewn i'r set byw...!!

Taith Gwanwyn 2013

Dwi'n edrych mlaen yn arw at y cyfres o gigs sydd gennai'n dod fyny yn y pythefnos nesa wrth i mi deithio o gwmpas Cymru gyfan. Mi fyddai'n cychwyn y daith nos Iau yma fyny yn Wrecsam fel rhan o'r wyl FOCUS lle fyddai'n rhannu'r llwyfan gyda neb llai na Charlotte Church. Welai chi gyd rhywle yn ystod y daith gobeithio! Mi fydd Gildas yn cefnogi fi ar rhan o'r daith - mae o ar fin rhyddhau ei ail albwm 'Sgwennu Stori' felly newch yn siwr eich bod yn cyrraedd yn gynnar!

Iau 25ain Ebrill - FOCUS Cymru, Wrecsam
Gwe 26ain Ebrill - Blue Sky Cafe, Bangor * ^^
Sad 27ain Ebrill - Ty Siamas, Dolgellau ^^
Sul 28ain Ebrill - The Hours Café, Aberhonddu **
Llun 29ain Ebrill - Glee Club, Caerdydd
Maw 30ed Ebrill - Theatr Mwldan, Aberteifi
Iau 9ed Mai - Parrot Bar, Caerfyrddin
Gwe 10ed Mai - Drwm, Llyfrgell Gen, Aberystwyth ^^
Sad 11ed Mai - Queens Hall, Arberth (cefnogi Paper Aeroplanes)

* - wedi gwerthu allan
** - wedi symyd o'r Guildhall bellach i'r Hours Café

^^ - gyda chefnogaeth gan Gildas

Clychau'r Ceirw - Sengl Dolig

Ma'n sengl Nadolig ni 'Clychau'r Ceirw' allan heddiw i'w lawrlwytho oddi ar iTunes - ma'r elw i gyd yn mynd at Ty Gobaith - achos teilwng iawn. http://www.hopehouse.org.uk/care/ty-gobaith-facilities

Ty Tawe - Abertawe

Gig Acwstig wythnos i heno yn Nhy Tawe, Abertawe gyda Gildas.

Am docynnau ffoniwch - 01792 456856

Cychwyn am 8:30 y.h.

Taith ledled Cymru gyda'r 'Awyrennau Papur'

Hello pawb!

Dwi newydd dod nol o dreulio pythefnos yn Nashville, Tennesse yn recordio fy albwm nesaf.

Mi odd hi'n brofiad anhygoel cael gweithio gyda cherddorion mor dalentog a tra oni yna wnes i sgwennu blog bach, felly os hoffech chi ddarllen mwy am fy amser yn yr Unol Daleithiau yna ewch draw i - http://allewismusic.posterous.com/

Fedrwch hefyd weld amryw o luniau neshi gymryd tra allan yna : http://flic.kr/s/aHsjyV5XPA

Rwan dwi nol ac yn barod i ymadael ar daith a fydd yn mynd a fi ar draws Gymru gyfan efo fy nghyfeillion 'Paper Aeroplanes'. Mae Sarah (a wnath lleisiau cefndir ar yr albwm diweddaraf 'Ar Gof a Chadw') yn wreiddiol o Aberdaugleddau a Richard o Aberteifi ac mae nhw wedi rhyddhau dau albwm o safon yn barod ac ar fin wneud eu drydedd.

Da ni'n chwarae mewn lleoliadau hyfryd felly byddwch yn siwr o cael eich tocynnau'n gynnar rhag cael eich siomi!

Mae'r holl manylion ar fy wefan: http://www.allewismusic.com

Dyddiadau Byw

Gwe 4ydd Mai - Acapela, Pentyrch - cliciwch yma
Sad 5ed Mai - Parrot, Caerfyrddin - cliciwch yma

Iau 10ed Mai - Llew Du, Aberystwyth - cliciwch yma
Gwe 11ed Mai - Blue Sky Cafe, Bangor - cliciwch yma
Sad 12ed Mai - Ty Siamas, Dolgellau - cliciwch yma

Gwe 8ed Mehefin - Theatr Grand Abertawe - cliciwch yma
Sad 9ed Mehefin - Theatr Torch, Aberdaugleddau - cliciwch yma

Cofion cynnes

Al

Gigs Ifor Bach yn cyflwyno.....

Gig Cyntaf 2012

Nos Fercher 8ed Chwefror - 

Gwdihw, 6 Guildford Crescent, Caerdydd CF10 2HJ

Drysiau am 8y.h 

Mynediad £4

https://www.facebook.com/events/224341187646922/

Y Flwyddyn a fu....

Croeso i 2012!

Dyma'r adeg o'r flwyddyn lle mae pobl yn dueddol o edrych nol. Gweithgaredd da ni fel band yn gyfarwydd iawn efo erbyn hyn, gan fod ein albwm 'Ar Gof a Chadw', ddoth allan yn 2011 wedi ei seilio ar yr syniad yma o edrych nol, a'r teimlad o berthyn a sut mae hyn yn newid wrth i ni fynd yn hŷn.

Mae hi'n flwyddyn bellach ers i ni gwblhau'r albwm hon a mae hi di bod yn flwyddyn lwyddiannus i ni fel band yn 2011. I orffen y cwbl ddoe; cafo ni'r newyddion gwych ein bod ni wedi dod i’r brig yn 'Siart C2' y flwyddyn (2011), anrhydedd mawr o gysidro'r holl gynnyrch da Cymraeg sydd wedi ei ryddhau yn ystod blwyddyn dwetha.

Mi nath hyn sbarduno'r awen i mi ysgrifennu blog newydd, wedi i mi sylweddoli fod hi'n 6 mis ers y blog dwethaf! Fel mae amser yn mynd heibio!

Gafo ni gychwyn da i 2011 hefo'r newyddion ein bod am fod ar glawr 'Y Selar' ar gyfer rhifyn cyntaf y flwyddyn - http://www.y-selar.com/products/rhifyn-ebrill-11-/

Ym mis Ebrill enillon ni'r wobr RAP am artist gwrywaidd y flwyddyn a lawnsiad swyddogol ar gyfer 'Ar Gof a Chadw'.

Aethom ni hefyd, fel gwesteion ar rhaglen C2 Huw Stephens a neud set acwstig iddo -

http://www.bbc.co.uk/radiocymru/c2/safle/sesiynau/cynnwys/2011_al_lewis.shtml

Ar ddiwedd y blog dwetha oni di son am y ffaith ein bod ni wedi bod yn brysyr yn ffilmio ym Mhrestatyn ar gyfer y gyfres diweddaraf (bellach olaf!) o 'Nodyn'.

Cafodd y gyfres honno ei darlledu dros yr haf ac roedd yr oriau dreuilwyd yn sefyll yn yr oerni ar glaw wedi bod yn werth chweil wedi i ni weld y rhaglen orffenedig.
Hefyd fe perfformio ni 'Darlun' ar Wedi7 - http://youtu.be/Zhpk-c1FfrM

Yn mis Mehefin gafo ni gyfres o perfformiadau byw ac hefyd ar gyfer y teledu gan gynnwys 'Ar Gamera' a 'Noson Lawen' sydd dal ar clic gyda llaw! - http://www.s4c.co.uk/clic/c_level2.shtml?programme_id=496955624

Gafo ni glywed hefyd fod S4C am ddefnyddio'r gan 'Darlun' ar gyfer hysbysebu digwyddiadau'r sianel dros yr haf! 

Ym mis Gorffennaf aethom ni draw i Ysgol Gyfun Gymraeg Llangynwyd i rhoi cymorth i grwp o ddisgyblion a oedd newydd cychwyn band o'r enw 'Tiwn', da oedda nhw fyd!

Ges i hefyd y cyfle i fynd i'r Sioe Frenhinol am y tro cyntaf yn fy mywyd – diddorol iawn oedd o hefyd!!

Mis Awst a Eisteddfod Wrecsam!

Cychwyno ni ar Nos Lun yn y Pafiliwn efo'r 'Cyngerdd Clasuron Pop' yng nghwmni rhai o gewri'r sin fel CPJ, Meic a Chis, ma hwn hefyd ar clic!

http://www.s4c.co.uk/clic/c_level2.shtml?programme_id=501960042

Llanwyd gweddill yr wythnos wedyn hefo cymysgedd o berfformiadau ar y maes a hefyd cyngherddau yn y nos ar gyfer 'Cymdeithas yr Iaith' a Maes B wrth gwrs! Nos Fercher welodd y cynifer mwyaf o gigs i Sion Llwyd ar y bas – 3 set mewn 1 noson (a 5 arall yn y dydd) – phew!!!

Yn mis Medi wedyn cafodd 'Ar Gof a Chadw' ei lawnsiad cenedleuthol llawn a ddoth Shan Cothi draw i ngweld i yn Llundain ar gyfer y gyfres Bro a oedd yn trafod Cymru Llundain!

http://www.s4c.co.uk/clic/c_level2.shtml?programme_id=496524372

Ges i wahoddiad hefyd yn mis Medi fewn i stiwdios Gofod i weld Elen a Geth i drafod y ffaith fod fy albwm Saesneg 'In the Wake' wedi cyrraedd y rhestr-fer ar gyfer y Wobr Gerddoriaeth Gymraeg gyntaf!

Yn mis Hydref chwaraeo ni set yng Nghwyl Sŵn yng Nghaerdydd a gafo ni ymateb ffafriol gan y Wasg di-Gymraeg ar ffurf y cylchgrawn MMP a ddewisiodd 'Ar Gof a Chadw' fel 'Albwm y Mis'. http://themmp.tv/reviews/al-lewis-band-ar-gof-a-chadw/

Yn mis Tachwedd perfformiodd y band fel rhan o noson arbennig yn Eglwys St Ioan yn Nhreganna, Caerdydd gyda Zervas & Pepper a Ivan Moult. Lleoliad gwych ar gyfer cerddoriaeth acwstig!

Ym mis Rhagfyr gafo ni wahoddiad i fod yn westeion ar raglen Dolig C2 Huw Stephens ble perfformio ni bedair cân yn cynnwys 1 gân newydd Nadoligaidd gwreiddiol o'r enw 'Clychau'r Ceirw'.

Fe allwch wylio fideos or noson yn eu cyfanrwydd drwy fynd draw i:

http://www.bbc.co.uk/radiocymru/c2/safle/huwstephens/dolig_huwstephens.shtml

Mi oedd hi hefyd yn fraint cael rhannu'r llwyfan am y tro cyntaf efo un o'n arwyr ni o'n plentyndod Gruff Rhys!

Aeth fi ag Arwel hefyd fyny i Langollen i gymryd rhan yn y cyngerdd carolau ar gyfer Ty Gobaith. Oedd hi'n sicr yn noson oer gaeafol lle oni'n falch mod i wedi prynnu'r siwmper i gadw fi'n gynnes tra ar y llwyfan!

http://www.s4c.co.uk/clic/c_level2.shtml?programme_id=501931544

Ges i gyfle unwaith eto i ddod ar siwmper allan pan gafo ni alwad i fod ar raglen Huw Edwards 2011 – perfformwyd 'Darlun' wrth i'r panel drafod digwyddiadau'r flwyddyn a fu.

http://www.s4c.co.uk/clic/c_level2.shtml?programme_id=502058034

Siawns unwaith eto i gwrdd a un o'n arwyr ni – o'r byd chwaraeon tro hwn – neb llai na Mr Gareth Edwards!

© Mei Lewis Photography 2011

Cyfle unwaith eto i edrych nol ac wrth gwrs hefyd edrych mlaen ar gyfer be ddaw yn 2012!

Hwyl

Al, Arwel a'r bois x

Y Gwanwyn - Gigs a Nodyn

Helo na,

Dwi newydd sylwi fod hi'n reit hir ers i mi sgwennu rhywbeth fyny fan hyn yn y Gymraeg.

Felly nai gychwyn drwy son am y sesiwn oedde ni ar fin neud y tro dwetha i mi siarad efo chi.

Mi es i a'r hogie fewn i BBC Radio Cymru fel gwesteion ar raglen C2 Huw Stephens lle nathom ni berfformio pedair cân. Fe allwch wrando arnynt yn eu gyfanrwydd drwy fynd draw i: http://bbc.in/kIbkQE

Yr wythnos wedyn ges i'r anrhydedd o ennill y wobr am 'artist gwrywaidd' y flwyddyn yng nghwobrau RAP Radio Cymru - http://bbc.in/dWVFFc

Mi odd i'n ddiwrnod eitha brysyr ar y 18ed o Ebrill - dyna pryd ddoth yr albwm 'Ar Gof a Chadw' allan (ellwch chi'w lawrlwytho o Amazon - http://amzn.to/kqs6gG / iTunes - http://bit.ly/kaObXS neu drwy fynd i http://www.sadwrn.com/) 

a natho ni gychwyn drwy fynd draw i'r BBC yng Nghaerdydd unwaith eto! Tro ma oedde ni yne fel gwesteion Dafydd a Caryl sy'n cyflwyno'r rhaglen yn y bore (http://bbc.in/mdliSJ). Yn y pnawn wedyn aetho ni draw i Lanelli er mwyn perfformio ar y rhaglen Wedi 7.

Ym mis Mai natho ni perfformio cryn dipyn o gwmpas Cymru. Ar y penwythnos gwyl y banc oedde ni'n brysyr yn ffilmio ar gyfer y gyfres newydd o 'Nodyn' o le mae'r lluniau uchod'n dod o. Gan fod yr albwm yn son am y syniad o berthyn a'r teimlad o hiraeth mae rhywun yn gael wrth hel hen atgofion a edrych drwy hen luniau mi nath y tîm cynhyrchu dod fyny efo'r syniad o cael gyfres o hen luniau i ddod fyny ar y van tu ol i ni wrth i ni ganu.

Dwi'n edrych ymlaen i weld syt neith o droi allan!!

Dros y mis nesa ma rwan mi fydde ni'n perfformio ym mhob cornel o Gymru. O Bwllheli hyd at Pontardawe, ewch draw i'r dudalen gigs i weld lle byddwn ni a phryd!

Al

Ar Gof a Chadw - Ail Albwm (18.04.11)

Noswaith Dda,

Gobeithio nath pawb cofio troi'r clociau mlaen bore ma a llenwi'r Census fewn hefyd wrth gwrs!! Oddi hi sicr yn gysur i mi weld hi'n dal i fod yn olau hyd at 8 o'r gloch heno ma. Mae'r gwanwyn gobeithio ar y gweill rwan. Dwi nol yng Nghaerdydd heddiw ma gan fy mod i ag Arwel a Sion am recordio sesiwn acwstig ar gyfer C2 Radio Cymru pnawn fory a ddylse fod yn mynd allan ar rhaglen Huw Stephens wythnos i fory sef Nos Lun, 4ydd o Ebrill. Da ni am neud cwpl o hen ganeuon a cwpl o rhei newydd oddi ar 'Ar Gof a Chadw' fel rhagflas at y dyddiad rhyddhau o'r 18ed o Ebrill. Mae'n dod at adeg eithaf cyffroes i ni fel band rwan, da ni'n cychwyn giggio unwaith eto wythnos nesa, yn cychwyn yn 'Y Llangollen' ym Mhethesda ar nos Wener ac yne'n mynd draw i'r Whitehall ym Mhwllheli ar nos Sadwrn yr 2il o Ebrill. Mae'r gigs ma yn rhei o'r rhei cyntaf lle fydde ni'n chwarae deunydd newydd oddi ar yr ail albwm ac mae o hyd yn sefyllfa ddiddorol i fod ynddo fel band pryd ydech chi'n rhoi caneuon newydd yn y set i weld beth fydd ymateb pobl iddynt. Er fod y caneuon yn eithaf gyfarwydd i ni erbyn hyn, wrth gwrs does lawer o neb arall wedi'w clywed nhw tu allan i ni'n pedwar!

Felly os ydech chi o gwmpas penwythnos nesaf - dewch yn llu i barnu'r caneuon newydd!

Os hoffech chi rhag-archebu eich copi o 'Ar Gof a Chadw' mi ellwch chi neud rwan oddi ar y wefan Sadwrn.com. Fedrwch chi hefyd darllen cyfweliad nathom ni efo'r cylchgrawn 'Y Selar' yn eu rhifyn diweddaraf (Ebrill 2011) sydd ar gael i'w ddarllen ar-lein oddi ar y wefan http://www.y-selar.com/

Hwyl am y tro

Al, Arwel, Sion a CJ xx

Dŵr yn y Gwaed

Helo Pawb,
Dyma ni rhagflas i chi o'r albym newydd, 'Dŵr yn y Gwaed' allan Ebrill 18ed ar Rasal.
Dŵr yn y Gwaed by allewismusic
Mwynhewch
Al

Gwyl Swn yn fuan......

Dim ond 5 diwrnod sydd na i fynd tan ein gig yn Y Globe ar Albany Rd, Caerdydd efo Bryn Fon a Gildas. Da ni'n edrych ymlaen yn fawr iawn i chwarae gwyl 'Swn' unwaith eto am y drydedd flwyddyn erbyn hyn!

Am ragor o wybodaeth ewch i:

http://www.swnfest.com

Tocynnau ar gael oddiwrth:

http://www.wegottickets.com/event/88453

Froncysyllte / Albym Newydd

Helo Bawb,

Dyma llun o ni yn Froncysyllte dros y Haf pan oeddem ni yn ffilmio ar gyfer y gyfres newydd o 'Nodyn'.
Dros y Haf rhyddhawyd albym newydd Arwel (Gildas) - sef 'Nos Da'
Ewch draw i'w wefan sef - http://www.myspace.com/gildasmusicuk - am ragor y wybodaeth
Wythnos nesaf fydde ni nol ym Mhryn Derwen, Bethesda i cwblhau ein ail albym Cymraeg ni (di-enw ar hyn o bryd)
Felly cadwch eich clustiau yn agored yn barod am ragor o wybodaeth

Hwyl

Al a'r Bois

Gig yn Nhafarn yr Haul - Llanengan (Hel pres ar gyfer MS)

Noson i hel pres ar gyfer cangen Gwynedd/Ynys Mon o'r MS Society.
Dewch draw i Tafarn yr Haul yn Llanengan
Mynediad am Ddim -
Unrhyw cyfraniad/rhodd yn wirfoddol ac yn ddiolchgar!!
Croesi ein bysedd am noson braf!!
(welwch tudalen Facebook am fanylion bellach)

http://bit.ly/bm8vLe
.................

Evening to raise money for the Gwynedd/Anglesey Branch of the MS Society at the Sun Inn, Llanengan
No Entry Fee -
Any donations are voluntary and much appreciated!!
Fingers crossed for sunny weather
(see Facebook Event Page for details)
http://bit.ly/bm8vLe

O'r Stafell Fyw - C2 Radio Cymru

Gaethom ni wahoddiad gan Mr Owen Powell i ddod fewn i'r Ystafell Fyw yn ystod mis Mawrth.
Cewch glywed y canlyniad i fyny ar wefan C2 rwan, yn cynnwys 2 gan newydd oddi ar ein albym nesaf.

http://www.bbc.co.uk/radiocymru/c2/safle/yrystafellfyw/orielau/rhaglen05.shtml

Gig Canolfan Cymru Llundain / London Welsh Centre Gig

Nathom ni gig wedi'w trefnu gan Huw Stephens efo Huw M diwedd mis Chwefror ar gyfer dathliadau Dydd Gwyl Dewi.
Dyma ychydig o luniau nath Aled Llywelyn cymryd o'r gig.
Ewch i http://www.aledllywelyn.co.uk/?p=244 am ragor o wybodaeth

Clwb Ifor Bach - Nos Sadwrn (13eg Chwefror)

Dyma'r poster newydd sgleiniog ar gyfer ein gig ni nos Sadwrn ar y cyd efo Cowbois Rhos Botwnnog.
Dylse hi fod yn noson dda, felly dewch yn llu...

Clwb Ifor Bach - Nos Sadwrn 21ain Tachwedd

Dyma nodyn sydyn i adael pawb wybod y fydd y band yn chwarae nos Sadwrn yr 21ain yng Nghlwb ifor Bach
Dylse hi fod yn esgus dda i dathlu llwyddiant Cymru dros yr Ariannin!!

Fideo o Lle Hoffwn Fod (S4C)

Helo pawb,

Os fethoch chi ni ar Uned 5 Dydd Sul yma;
Gew chi wylio ni eto drwy fynd i:-
http://www.s4c.co.uk/clic/c_level2.shtml?series_id=340575446

Hefyd da ni di rhoi perfformiad ni oddi ar Wedi 7 fyny ar YouTube:






...ac yn olaf os ydech yng nghyffiniau Gaerdydd nos Wener dewch draw i Clwb y Diwc!!

Al
xXx

Lluniau o ni yn ffilmio 'Nodyn'

Dyma lun o gynharach yn yr Haf, pryd aethom ni i 'Tir Prince' yn Rhyl i recordio dwy gan ar gyfer 'Nodyn', i weld gweddill y lluniau ewch i:-


http://www.flickr.com/photos/allewis/sets/72157622140387066

Os fethoch chi ni ar Nodyn......

Gwyliwch fo eto ar-lein yma (pennod 5):-

http://www.s4c.co.uk/clic/c_level2.shtml?series_id=352419605

1.Trywydd Iawn (~30secs)
2. Lle Hoffwn Fod (~20min)

Mwynhewch....

Al & Arwel & Band